লেখকঃ শাহিনুৰ আলম
(ইছলামী আৰু বস্তুনিষ্ঠ )
১) বছৰৰ ১২ মাহত, চাৰি মাহ অৰ্থাৎ মহৰম, ৰজব, জী-ক্বা’দাহ, আৰু জীল-হাজ্জাহৰ যিদৰে উত্তম আৰু গুৰুত্ব তথা ফজীলতৰ অধিকাৰী, ঠিক তদৰূপ দিনৰ ভিতৰত চাৰিটা দিন, অৰ্থাৎ দুই ঈদ, শুকুৰবাৰ আৰু আৰাফাৰ দিনৰ তাৎপৰ্য আৰু গুৰুত্বও বিৰাট।
সপ্তাহৰ ঈদৰ দিন গুৰুত্বপূৰ্ণ দিনটো হল শুকুৰবাৰ, তদৰূপ বছৰটোত উত্তম দিনটো হল আৰাফাৰ অৰ্থাৎ ৯ জীল-হাজ্জাহৰ দিনটো।
( মিৰক্বাত- পৃষ্ঠা: ৩/২২৩, জামিউল উছূল)
২) সৃষ্টিকৰ্তা মহান আল্লাহে পবিত্র কুৰআনত আৰাফাৰ দিনৰ শপত খাইছে। যিনেকি স্পষ্টভাষাত আৰাফাৰ দিনৰ তাৎপৰ্য আৰু গুৰুত্ব প্ৰকাশ কৰিছে।
পৱিত্ৰ ক্বুৰআনত আছে – ” শপথ উষাৰ। শপথ ১০ ৰজনীৰ, শপথ যোৰ আৰু বেযোৰৰ।” (ছূৰা ফজৰ: আয়াত-১-৩)।
উক্ত আয়াতত যোৰ (even) শব্দৰ দ্বাৰা ঈদুল আজহাৰ দিন আৰু বেযোৰ (Odd) শব্দৰ দ্বাৰা আৰাফাৰ দিৱস বুজোৱা হৈছে ।
হজৰত জাবিৰ (ৰাঃ) ৰ পৰা বর্ণিত হাদিছে হজৰত মুহাম্মাদ (ছাঃ ) যোৰ আৰু বেযোৰ ৰ ব্যাখ্যা এইদৰেই কৰিছে। (তফছীৰে ইবনে কাছীৰ, মাআৰিফুল ক্বুৰআন, তফছীৰে কাৰতাবী, মুচনদে আহমদ- ১৪১০২)।
বিখ্যাত মুহাদ্দিছ হজৰত আকৰামা ৰাহঃ আৰু হজৰত জ্বাহ্হাক ৰাহঃ, এই দুয়োজনেও একে বাখ্যাক উল্লেখ কৰিছে।
৩) পৱিত্ৰ ক্বুৰআনত আন এঠাইত আল্লাহ পাকে কছম খাই এই দিনটো তাৎপৰ্য তথা গুৰুত্বপূর্ণ বুলি প্ৰমাণ কৰিছে।
” প্ৰতিশ্ৰুতিকৃত দিন, উপস্থিতকৰ্তা আৰু উপস্থিতকৃতৰ (অৰ্থাৎ উপস্থিত কৰোতা আৰু যাক উপস্থিত কৰা হৈছে) ৰ শপত। ” (ছূৰা বুৰূজ, আয়াত-৩)
হজৰত আবু হুৰাইৰাহ ৰাঃ ৰ দ্বাৰা বৰ্ণিত এটি হাদীছৰ দ্বাৰা জানিব পৰা গৈছে যে ইয়াত প্ৰতিশ্ৰুতিকৃত দিন বুলি কিয়ামতৰ দিন, উপস্থিতকৰ্তা বুলি শুকুৰবাৰ আৰু উপস্থিতকৃত বুলি আৰাফাৰৰ দিন বুজোৱা হৈছে। (তিৰমিজী- ৩৩৩৯)
৪) আৰাফাৰ দিনাই সৃষ্টিকৰ্তা মহান আল্লাহে কিয়ামত লৈকে পৃথিৱীত জন্ম লোৱা সকলো মানৱজাতিৰ পৰা প্ৰতিশ্ৰুতি গ্ৰহণ কৰিছিল। যাক পৱিত্ৰ ক্বুৰআনত ” আহদে আলাচতু (আলাচতু-প্ৰতিশ্ৰুতি) ” স্মৰণ কৰা হয়।
(ছূৰা আৰাফা- ১৭২, ১৭৩, হজৰত ইবনে আব্বাচ ৰাঃ)
৫) ৰাছুলুল্লাহ (ছাঃ) ঘোষণা কৰিছে যে, এনে কোনো দিন নাই, যিদিনা আৰাফাৰ দিনতকৈ বেছি জাহান্নামৰ পৰা অধিকভাৱে জাহান্নামী সকলক মুক্তি দিয়া হয়। আৰু তেতিয়া নিশ্চয় আল্লাহ পাক বান্দাৰ ওচৰ চাপে আৰু ফিৰিস্তাসকলৰ আগত গৌৰৱ কৰি প্ৰশ্ন কৰে যে , এই সকলে কি বিচাৰি আছে? (চহী মুছলিম-১৩৪৮) ।
৬) আলফাৰ দিৱসত দুআ কবুল হোৱাৰ দিন। এই দিনৰ দুআই হল শ্রেষ্ঠ দুআ। এই সন্দৰ্ভত ৰাছূলুল্লাহ (ছাঃ ) ৰ ঘোষণা –
” সকলো দুআৰ শ্রেষ্ঠ দুআ হ’ল আৰাফাৰ দিনাৰ দুআ । (তিৰমিজী : ৩৯৩৪)।
৭) আৰাফাৰ দিনাই পৱিত্ৰ ক্বুৰআন যোগে আল্লাহ পাকে দ্বীনে ইছলাম সম্পূৰ্ণ হোৱাৰ কথা ঘোষণা কৰিছে। যাক নবী মুহাম্মদ ছাঃ এ বিদায়ী হজ্বত বিশ্লেষণ কৰি চাহাবাসকলক শুনাইছিল।
” আজি আমি তোমালোকৰ বাবে তোমালোকৰ দ্বীন সম্পূৰ্ণ কৰিলোঁ…. । ” (ছূৰা মাঈদাহ-৩)

৯ জীলহাজ্জাহ অৰ্থাৎ ২০ জুলাই ২০২১, মঙলবাৰৰ ফজৰৰ পৰা আৰম্ভ কৰি ১৩ জীলহাজ্জাহ অৰ্থাৎ ২৪ জুলাই ২০২১, শনিবাৰে আছৰ লৈকে প্ৰতি ফৰজ নামাজৰ পিছত (জামাতত বা অকলশৰীয়া) তকবীৰে তাশ্বৰীক পঢ়াটো ৱাজিব আৰু জৰুৰী।
তকবীৰ- ” اَللّٰہُ اَکْبَرُ ، اَللّٰہُ اَکْبَرُ ، لَآ اِلٰہ الَّا اللّٰہُ ، وَاللّٰہُ اَکْبَر ، اللّٰہُ اَکْبَر ، وَلِلّٰہِ الْحَمْدُ۔
উচ্চাৰণ: আল্লাহু আকবৰ, আল্লাহু আকবৰ, লা-ইলাহা ইল্লাল্লাহু, ৱাল্লাহু আকবৰ, আল্লাহু আকবৰ, ৱা-লিল্লাহিল-হামদ।

Show CommentsClose Comments

Leave a comment

en_USEnglish